NÒT POU LAPRÈS.
FANM VANYAN KAP LITE POU SOVE SOUVRÈNTE AYITI
Yon gro kout chapo pou laprès pale, ekri, televize, epi an liy.
Nou FANM VANYAN salye konviksyon tout popilasyon ayisyèn nan epi felisite yo pou konpreyansyon yo sou zafè fen manda Jovenel Moïse la daprè atik 134.2 a,epi atik 239 nan dekrè lwa elektoral la.nap kontinye pou nou felisite tout fòs viv nasyonal la tankou :SOSYETE SIVIL YO,PATI POLITIK YO,SEKTÈ RELIJYE A,ÒGANIZASYON DE BAZ YO,CSPJ ki fikse pozisyon sou fen manda enkilpe Jovenel Moïse la ak divès gran pèsonaj ekzanp LILIANE PIERRE PAUL kòm Yon ikon nan sosyete a pou nou site sa yo sèlman, pandan nap pwofite mande ti rès Sena ki gen nan tèt li senatè Joseph Lambert pou fikse pozisyonl nan Yon dèle 24è si li pa vle popilasyon an kontinye pranl pou konplis nan tout zak enkilpe a ap kontinye fè sou popilasyon an.
Nou FANM VANYAN salye efò tout kamarad nou yo ki retrouve yo nan dyaspora kap fè Yon travay enpekab nan batay la,kote yo enplike yo sou tou fòm nan batay la.ke nan strateji,ke nan demach diplomatik yo pou nou di sa yo sèlman,men tou yo fikse pozisyon yo sou fen manda enkilpe Jovnel Moise la.
NB:batay yo a tèlman enpòtan nou ka konstate yè aprè midi kongrè ameriken an fikse pozisyon l se pa pou bon plezi,ni pa yon senp enkyetid men se fri travay dyaspora a ak divès lòt aktè nan vi nasyonal la.
FANM VANYAN ap profite moman pou denonse tout fòm represyon enkilpe a ap fè sou popilasyon an ni sou pèsonaj ki nan bwat jidisyè a, ni sou polisye ki pa dakò antre nan konfyolo ak Jovenel pou mete kanpe diktati nan peyi a.
FANM VANYAN KAP LITE POU SOVE SOUVRÈNTE AYITI
Di w ansyen prezidan peyi a Jovenel Moïse ou pa gen lejitimite prezidansyèl nan peyi a ankò daprè atik 134.1,134.2 jiska 134.3 epi atik 239 lwa elektoral 2015 lan. définitivman manda w fini Jodi 7 Fevriye 2021 yan kòm prezidan;ki donk ou se Yon senp sitwayen men ki pa menm jan ak lòt sitwayen onèt yo paske ou sipoze mete w diponib pou w al devan lajistis pou tout deriv ou fè nan peyi a.
Dezòmè FANM VANYAN pa rekonèt ou kòm prezidan peyi a ankò nap konseye w pou w pa fè tèt di paske pèp sa se yon pèp ki souvren, endepandan li pa depan de pèsòn,li depan de pèp la.
Nap fini pou nou di AK rejim PHTK AK tout ti politisyen tradisyonèl ki nan konfyolo pou kenbe Jovenel nan peyi a je pèp la kale,yo grandi,yo gen bon konprann yo pap pran blòf nan men okenn grenn senk nan batay pèp la.
Antouka FANM VANYAN di w si w se sa di w se sa,si w pa sa ranje kò w bay pèp la pase paske nan sa pèp la ye la kenpòt grenn senk,ouvriye politik ki kanpe devan l tren popilè a ap pase pran yo ak tout enkilpe Jovnel Moise la.
Manb ki siyen nòt pou laprès sa se:
Jules Manoucheka
kòdonatris jeneral
Félix Francia
Sekretè adjwent
Sheila Pélicier
Pòt pawòl jeneral.
