REFLEKSYON YON PATRIYÒT SOU KONJONKTI MAS 2021 AN

REFLEKSYON YON PATRIYÒT SOU KONJONKTI MAS 2021 AN

Kan Pèp la anfas yon lenmi ki puisan ak danjre. Lenmi Kan Pèp la se dabò leta pouri an dekonpozisyon total la ki gen ladann boujwazi biwokratik la (Granmanjè kap souse leta a), se boujwazi konpradò a (enpò-ekspò), se grandon yo (nan kanpay yo), se tiboujwazi reyaksyonè a, se politisyen abolotocho yo. Yo tout konstitye BLÒK OPOUVWA a, sou dikta peyi kolon enperyalis yo. Yo tout fè fayit byen lontan deja nan pwomèt Pèp Travayè a lalin pou fwonmay. Sistèm ekonomik ak politik yo enpoze sou nou an pa mache pou nou ditou, ditou. YO PA GEN SOLISYON POU KRIZ ESTRIKTIRÈL LA!

Se pou sa lenmi Kan Pèp la deja komèt anpil krim kont Pèp la. Pa ekzanp, ant Novanm 2018 a Mas 2021 an, lenmi Kan Pèp la fè plis ke 10 masak tankou Masak Lasalin, masak Bèlè, masak Kafoufèy, masak Kafou Marasa, masak Tokyo, masak Pon Wouj, masak Gresye, masak Ba Dèlma, masak Matisan, masak Fò Nasyonal, masak Raboto elatriye. Rejim sanginè Jovenel Moise/Jouthe/phtk a rantre nan Lojik vyolans reyaksyonè kont Pèp la nan enterè klas dominan reyaksyonè yo ak peyi kolon enperyalis yo.

Vyolans reyaksyonè a, represyon a outrans la se fòm gouvènans ak dominasyon tout klas dominan reyaksyonè yo ak peyi kolon enperyalis yo pran nan moman an. Se w agresyon reyaksyonè total kont rezistans Pèp Ayisyen an, rezistans Kan Pèp la. Fòs represif yo ap aji kont mouvman revandikasyon demokratik Pèp Ayisyen an pandan yap eseye restriktire fòs lanmò yo. Yo pè mobilizasyon ak rezistans Kan Pèp la.

Gen w aparans kote yo parèt ap kraze fòs lapolis la pakanpak. Men an reyalite se demoli yap demoli eleman osen fòs represif lapolis la ki pa vle mache nan lojik ilegal eta majò lapolis la ki osèvis rejim sanginè a. Pa ekzanp, gen tout mezi ilegal direksyon jeneral lapolis la ap pran kont Sendika Lapolis la, SPNH la ak arestasyon abitrè e ilegal Pòtpawòl Sendika a, Abelson Gros Nègre. Yap arete sendikalis pandan yap pwoteje chèf gang ame asasen, kriminèl.

Rejim sanginè a òganize ak federe gang ame asasen, kriminèl yo, G9 an fanmi e alye (manyen youn, manyen tout). Yo mete kanpe yon ajans espyon kriminèl ANI ak yon fòs tonton makout BSAP pou kontinye reprime Pèp Ayisyen an. Dapre dènye enfòmasyon ki tonbe de divès sous lapolis la menm, eta majò lapolis la entegre de gang/bandi anndan lapolis la nan yon kò yo rele ALL BLACK pou fè tout kalite krim sou Pèp la. Tankou pawòl la di, “ lè bandi opouvwa, plas moun onèt se nan prizon!”

Tout krim sila yo se pou kenbe mas popilè yo anba nèt nan plas yo, kraze mobilizasyon ak rezistans Pèp la epi fasilite menmiz klas reyaksyonè yo ak peyi kolon enperyalis yo sou richès ak resous natirèl peyi a tankou 8 mil ekta tè nan Savann Dyann rejim sanginè defakto Jovenel/phtk a bay konpayi Apaid ak Koka Kola ilegalman.

Tout moun dominan nan entènasyonal la ki te konn ap di demagojikman yo se Zanmi Pèp Ayisyen an parèt tèt yo aklè an soutyen/sipò total a bouwo leta pouri a. Yon leta pouri kap itilize gang ame asasen, kriminèl, lame po bannann lan ak lapolis politik la pou masakre Pèp Ayisyen nan katye popilè yo.

Pèp Ayisyen an kap mande respè konstitisyon an, an patikilye Atik 134-2 a wè klèman kouman se anbasadris Ameriken an, madan Sison, reprezantan binuh/loni ann Ayiti, madan Lalime, Core Group, OEA, Linyon Ewopeyèn, Kanada, Lafrans, Lespay kap pote kole nan travay sal rejim sanginè defakto a pou foure ilegalman yon referandòm sou konstitisyon ak yon “eleksyon” malatchong nan gagann nou. Se pou nou rejte ak fware plan makab sa a kolektivman. Nou tout nan Kan Pèp la dwe pale de yon sèl VWA FÈM!

“Entènasyonal” la sipòte vyolasyon defakto yo ap fè kote yap eseye pran pwolonjman apre manda yo fini depi 7 Fevriye 2021. Kouman èske peyi sa yo toujou ap di yap pwone “demokrasi” pandan yap kore deriv sa yo ann Ayiti? Mask la tonbe nan figi tout peyi kolon enperyalis yo paske sa yap fè ann Ayiti la se sipòte yap sipòte otokrasi/diktati yon rejim ekonomik ak politik pouri, sanginè ak reyaksyonè, donk anti Pèp.